EENDSJES VORE

De plaotselike boelklub organiseerde e toernooj in ‘t park. Neet op aofgezat terrein meh gewoen, op de kiezelpeedsjes. Dao woord ouch neet gezag boe, de zeukdes ‘t d’ch mer oet.
Örreges op ‘t graas oonder de buim stoond e merretkräömpke es zjurietent, örreges op ‘t graas oonder de buim stoond e merretkräömpke mèt flesse wien en flesse beer en flesse limmenaad, örreges op ‘t graas oonder de buim stoond e merretkräömpke mèt friet en frikkedelle en hotdogs en balle gehak en... En weier sjijnde de zon tösse de blajer vaan de buim.
Wat wèlt ‘ne boeler nog mie! ‘t Toernooj winne netuurlik. Meh dat is neet eder team gegeve.

Tösse de twiede en derde runde slenterde Zjao langs d’n eendevijver en wie gewoenelik es ‘r eende zaog vroog ‘r z’ch aof boeste noe aon kós zien wat e menneke waos en wat e vruijke.
Mèt z’n èllebäög steunend op ‘t hek prakkezeerde heer euver ‘t mysterie en perbeerde e antwoord te vinde. Tonny, oonbewus vaan ‘t probleem boe Zjao mèt worstelde, kaom kammeraodsjappelik neve häöm leune. Zjao had respek veur Tonny want dat waos ‘n klevvere vent dee väöl had roondgezworreve op de wereld, dus väöl had gezeen en dus väöl wis.

“Tonnie”, begroetde Zjao häöm enthousias, “jóng, de kumps es gerope. Wètste, iech staon m’ch heij aof te vraoge wieste oondersjeid kins make tösse e mennekes eend en e vruijke.”

Oondertösse tot Zjao aon Tonnie oetlag tot dat neet d’n ierste kier waos tot ‘r z’ch dat aofvroog stoond Tonnie dudlik mèt z’ne kop te knikke es teike tot heer ‘t wis.
Wie Zjao klaor waos mèt z’n touwliechting zag Tonnie gewiechtig:

“Gans simpel. “Dat perbeert me oet mèt e stökske broed.
Dat hèlste de bieste veur en es zie ‘t ierste denao sjnap, daan is ‘t e vruiwke en es heer ‘t ierste denao sjnap, daan is ‘t e menneke.”

Frans heet Tonnie noets mie gevraog um de oplossing vaan e probleem.

 

Gesjreve door Jo Caris.

Zoeken